towaristwo

 

Sedym wjeskow a srjejdźa Slěpe ze swójeju cerkwju: To jo mała hokolina, w kótrejž se do dźeńsajšego chójdźi w pisanej a na warianty bogatej burskej drasće a kótraž jo jednorazny folklorny region. Ležy cyle na północy Sakskeje, hobdate wót góle, a na pěskowej zemi, do kótrejž se huglowe bagery žerje. Jo bałdy mały dźiw, až su se how wósebna serbska narěc  (Slěpjańska serbšćina aby slěpjańšćina) a wjele starych nałogow zdźeržali.
Wót lěta 1920 jo industrializacija how jare wjele změniła, ale tež politiske nućenja lětow 1933 do 1989 a kulturelne ćewikowanje zajšłych lětdźesetkow su zawóstali slědy na tradicionelnej, starej serbskej kulturje Slěpjańskeje wósady.

Towaristwo Kólesko z.t. (załožone 2012) jo se dało nadawk, kulturelne herbstwo zdźeržać, se za nje starać a je zjawnosći pokazać – k widźenjoju a słyšanjoju.
Nejwažnjejše póla towaristwa su:

    • Dokumentacija, publikacija a hužywanje regionalneje warianty serbšćiny – Slěpjańskeje serbšćiny – kaž tež zdźěłanje rěcywědnych hopisowanjow narěcy
    • Dokumentacija burskeje drasty Slěpjańskeje wósady ze wšyckimi jeje wariantami, pórědźenje a šyće
    • Nosenje Slěpjańskeje drasty ći šelakich swědźenjach, k swětym dnjam w cerkwi aby ći spiwanju
    • Zdźeržanje a staranje za serbske spiwy a tradicionelnu Slěpjańsku muziku
    • Starjanje a dalejwjedźenje serbskich nałogow a tradiciow Slěpjańskeje wósady
    • Dokumentacija serbskich kulturnych stawiznow Slěpjańskeje wósady kaž powjesće, baje, gronka, hulicowanja a měnowěda
    • Dokumentacija a zdźěłanje huwićowych a kulturnych stawiznow Slěpjańskeje wósady w słowje a hobrazu
    • Dokumentacija twórjecego huměłstwa Slěpjańskeje wósady wót zachodnosći do dźeńsajskego casa
    • Póbitowanje huslědkow južon dokumentěrowanych Slěpjańskich kulturnych stawiznow w formje hozjawjenjow a ćišćanych dokumentow

 

SB slěpjańšćina – Schleifer Sorbisch DEDeutsch – němski